Неименуван купувач платил неверојатни 480.000 долари за познатиот сино-бел фустан кој Џуди Гарланд во 1939 година го носеше во филмот „Волшебникот од Оз“.

„Постигнатата цена е во склад со нашите очекувања“, соопшти аукциската куќа Julien.

Сличен фустан кој е носен за време на подготовките за снимањето на овој класик продаден е минатата година за 910.000 долари, а претставниците на аукциската куќа која го продаде оригиналот, разликата во цената ја објаснија со многу помалиот број на примероци на пробниот фустан, од оној кој е користен во филмот.

Фустанот е дело на костимограф од студиото MGM, Едријан Гринберг, а идентитетот на купувачот не е објавен.

Во последно време филмските костими станаа многу барани на аукции, а минатата година белиот фустан кој Мерилин Монро го носеше во филмот „Седум години верност“ продаден е за неверојатни 4,6 милиони долари.